Sunday, February 21, 2016

Daytoy ti biag

masansan a kastoy
ti makitak a biag
ti kinabirhen dagiti sabong
ti linnaaw, ti kulibangbang
umay met iti panaginaw ken
panagsikog ti ina
ti ubing iti taeng kas met iti
mula iti muyong
ti tao a managgalla-alla
kumuyog kadagiti maruros a bulong
ti lubong: ti tapok
ti nakaparsuaan
ti tudo
ti angina
ti ulep
ti langit
ti taw
dagiti panagdaliasat
adda bisin-waw
adda saem-sam-it
iti agrikusrikus
a panagbirok
iti siping
adda katawa-sangit
iti aklili iti panawen
uray napno latta
ti sugat iti barukong
ti ina, ti ama, ti anak
iti awan itiitan a lansangan
ken karinderia
iti kastoy a ladawan
ti gimong daytoy a metropolis
ket ti sabong malaylayda
di ammo no nakaibatida
iti bukel ti sabali a namnama.
kastoy ti biag a napno iti burburtia.

Amado I. Yoro

January 20, 2016 

No comments:

Post a Comment